موال الثورة

خليني آخـــــــــد بيـــــدّك وانتِ بتعـــــــدّي

واهب حيـــــــاتي وِمجدِك إســـورة فْ يدّي

الثورة موجــــــــها عِلِي والبحــر مالو كبير

وعواصـــــــــف التغيير ..هبِّت ما بِتهــــدِّي

***

وانتِ القصـــــــيدة العنيـــدة.. لو تهاوديني

أنسـج لك المستحيل -والنول رموش عيني-

فســـتان وطرحة وكرامة صيتها مالو حدود

واخلِّي حريتـــــك دى معبـــــــدي وديني !

***

صلّيت عشـــانك يا غاليــــــــة.. لما أذِّنتِ

وقلتِ صــــــبرِك نَفَد .. عَ القلب مــا هُنتِ

وِقفوا العســـــاكر ورايا في ركوع وسجود

كأني مذنب وبهرَب..دا انتِ شــــــــــاورتِ

***

وانا اللي طول عمري عاشـــــــق مواويلك

واتمنى لو دمّي –يوم- يســــرِج  قنـــاديلك

تدوس عليه الخيـل اصرُخ وانـا مجــــروح

واهتف بعلو الصوت: دَمّي فِــــــــــدا نيلك

***

بات الميـــــدان وِجْهتي .. والصبر مَلحمتي

يا مصـــــــــــر يا كعبتي .. والظلم مَظلمتي

بَرسِم خَريطــــــة فَلاحك من شــــــــراييني

والدمّ عَ الأرض يشــــــهد وانتِ ما شهدتِ

***

بِترابـــــــِك اتيمِّم .. وِينــــــــام عليه خدّي

صـــــلاتي دي ثورتي .. يا هِمّتي اشـــتدّي

  حبيبتي نامت وانا ســــهران وجرحي يئنّْ

والموت فِ توبي وِمِتفصّـــــل على قدّي !

***

غُصن الزتون كان فِ إيدي وسيف ملاقيني
قابيــل وســــــــيفه كفَر .. قطّع شـــــراييني

يهلَك ضنـــــاكِ وِيتشــــــمِّت بكِ الأعـــــداء

شـــــرف الخصـــــومة اندبح لما دبحتيني !

***

ما عُمـــــــري يوم خُنتِكْ  ليه انتِ خُنتيني

بالتِّبْرِ مـــــا بِعتِـــكْ  وِرخيــــــص تبيعيني

ليــــه الميــــــــزان انقلبْ .. مَلِّكتِ عُذّالِك

وبقلب زيّ الحجر.. داســـوا على جبيني!

***

يا مصـــــــر ثارت بعد خمـــــــود براكينك

صبّت غضبــــها على إجـــــرام فــراعينك

يـا ثـورة التحريـــــــــــر.. يـا حلم أحلامنا

مين اللي قال انّنا نِمنـــا وناســــــــــيينِك ؟

***

شــــبابكِ الحُرّ حَطّم فِ الميدان أصـــــنام

مين علّمُوا فِ المِحَن يِعلا ويبقى هُمــــــام

ويحقّق الحِــلم لو كان باتّســـــــــاع الكون

وِلحدّ لَمْس الشمس ما تِعصى عليه أحلام !

***

في الضلمة خفــاش بيســـعى يوئدِ المولود

بيمصّ دمّو عشــــــــان الظلم تـاني يعـــود

خبّي الأمل فِ العُيــــون وارميها مُكحـلتـك

والعدل شمسو حتطلع في الليـــالي السُّـــود

***

25/1/2011

مِن ديوان: كلام مِن خَشَبْ